21 лютага ў 17:00 у Мастацкай галерэі "Універсітэт культуры" адбудзецца адкрыццё выставы "Клінцы стараабрадніцкія".

Гэтая выстава ўжо экспанавалася ў Веткаўскім музеі. І цяпер на працягу двух тыдняў з 23 лютага па 11 сакавіка яе можна будзе пабачыць у сталіцы краіны.

Клінцы з’яўляліся часткай адзінага з Веткай стараабрадніцкага рэгіёна. У маі 2022 года мы нават зладзілі навуковую экспедыцыю ў гэты горад, дзе знайшлі багата цікавай спадчыны стараабрадніцкай Веткі.

Асноўную частку выставы складаюць жывапісныя карціны клінцоўскага мастака Дзмітрыя Павукова, прысвечаныя стараабрадніцкаму храму Праабражэння Гасподняга і важным падзеям жыцця клінцоўскага стараабрадніцкага прыхода.

Частка выставачнай прасторы будзе адведзена тэме клінцоўскай друкарні: можна будзе пабачыць клінцоўскія старадрукі, якія ёсць у фондах Веткаўскага музея.

Яшчэ вы пабачыце чаканеныя і бісерныя аклады, святарскае адзенне, лестаўкі і іншыя прадметы царкоўнага ўжытку з калекцыі клінцоўскага Праабражэнскага стараабрадніцкага храма.

Запрашаем на адкрыццё выставы, якое адбудзецца з удзелам мастака Дзмітрыя Павукова, галоўнай даследчыцы стараабрадніцкай кніжнай культуры Святланы Лявонцьевай, і дырэктара Веткаўскага музея Пятра Цалка.

Адкрыццё: 21.02.2023 у 17:00.

Мастацкая галерэя "Універсітэт культуры" (Кастрычніцкая плошча 1, Палац Рэспублікі).