18 сакавіка ў філіяле Веткаўскага музея мы вырашылі дапоўніць сумесны прагляд фільма "Несцерка" смачным майстар-класам. Таму, паралельна абгаворваючы пабачанае кіно, прыгатавалі, а пасля і пасмакавалі зацірку - страву, якую лічаць беларускай нацыянальнай.

Але ж, вельмі верагодна, што не ў нас яна была прыдуманая. Страва з такой жа назвай ёсць у польскай кухні, у венграў падобная страва вельмі папулярная пад назвай "тархоня", такія стравы ёсць у туркаў і ў іншых цюркскіх народаў, а яшчэ ў харватаў і італьянцаў... Карацей, з паходжаннем ёсць пытанні.

Але мы раскажам пра рэцэпт і пару сакрэтаў прыгатавання, якімі падзялілася на майстар-класе загадчыца філіяла Веткаўскага музея Наталля Кадзетава.

Для нашай заціркі патрэбна: адна шклянка мукі, адно яйка, адзін літар малака, крыху солі, 70 гр. вяршковага масла.

Працэс: муку неабходна падсмажыць на сухой патэльні без алея ці масла да светла-карычневага колеру. Як толькі мука падсмажылася, перасыпце яе ў глыбокую місачку - мука павінна крыху астыць. Наліце ў рондаль малако, і пастаўце яго на агонь, каб закіпела. У гэты час, як мука крыху астыла, дадайце ў яе дробку солі і яйка. І вось тут самы галоўны сакрэт заціркі - старанна зацірайце, то бок перацірайце, муку з яйкам, каб атрымаліся дробныя камячыкі цеста. Як малако закіпіць - засыпайце ў рондаль атрыманыя камячыкі. Туды ж дадайце вяршковага масла. І варыце 5-7 хвілін на невялікім агні, увесь час памешваючы. Вось і ўсё - у вас атрымалася зацірка! Смачна есці!

Хто прыгатуе зацірку па нашым рэцэпце, падзяліцеся ў каментарах, як атрымалася, добра?