Беларускі народны іканапіс і традыцыйнае ткацтва ў кантэксце абраду «Свяча»
Выстава будзе дзейнічаць з 28 снежня 2018 г. па 19 мая 2019 г. у філіяле Веткаўскага музея.
Абрад «Свяча» з'яўляецца адным з самых адметных абрадаў у традыцыйнай культуры беларускіх вёсак Гомельшчыны. «Свячой» называюць як абрад, так і яго рытуальныя прыналежнасці. Паколькі вывучэнне дадзенай тэмы стала адной з асноўных у навуковай дзейнасці супрацоўнікаў Веткаўскага музея, таму мы цікавіліся ім падчас усіх экспедыцый апошняга часу і атрымалі, на наш погляд, вельмі цікавыя вынікі, і адным з вынікаў такіх даследаванняў з'яўляецца выставачны праект «Ікона звалась Свячой… ». У выставачнай прасторы тэксты, запісаныя супрацоўнікамі музея ў шматлікіх экспедыцыях па Гомельшчыне, а таксама суседняй Браншчыне, паўстаюць перад намі ў своеасаблівыя вобразныя, тэматычныя комплексы-інсталяцыі. Самае галоўнае, што атрымалася дасягнуць арганізатарам выставы — гэта матэрыялізаваць духоўную, нематэрыяльную фальклорную спадчыну. Словы носьбітаў спрадвечных ісцін, запісаныя на дыктафоны, ці паперы супрацоўнікамі музея пачынаюць складвацца ў цэлыя «карціны», ператварацца ў «кінафільмы» перад наведвальнікамі. Так, у выставачнай зале можна пабачыць аўтэнтычныя і рэканструяваныя тыпы Свечаў, што існавалі і існуюць зараз на Гомельшчыне, традыцыйны народны іканапіс і традыцыйнае ткацтва. І ўсё гэта аб'яднана адной тэмай — абрадам «Свяча».
Пры падрыхтоўцы выставы выкарыстаны экспанаты з фондаў «Веткаўскага музея стараабрадніцтва і беларускіх традыцый імя Ф.Р. Шклярава», «Царкоўна-гістарычнага музея Беларускай праваслаўнай царквы» пры Мінскай духоўнай акадэміі, «Гомельскай епархіі Беларускай праваслаўнай царквы».
На выставе прадстаўлены амаль два дзясяткі народных ікон канца XVIII — пачатку XX ст. Больш чым паўсотні ручнікоў канца XIX — сярэдзіны XX ст. Дванаццаць комплексаў аўтэнтычных і рэканструяваных «Свеч». А таксама экспедыцыйныя фотаздымкі абраду, сшыткі з рукапісамі псальмаў і фальклорныя тэксты звязаныя з рытуальнымі момантамі і дзействамі.
